ಪಾಣಕ್ಕಾಡ್ ಸಯ್ಯದ್ ಮುಹಮ್ಮದ್ ಅಲಿ ಶಿಹಾಬ್ ತಂಙಳ್; ಹೃದಯಗಳತ್ತ ಸಾಗಿದ ಹೆಜ್ಜೆಗಳು
ಪಾಣಕ್ಕಾಡ್ ಸಯ್ಯದ್ ಮುಹಮ್ಮದ್ ಅಲಿ ಶಿಹಾಬ್ ತಂಙಳ್; ಹೃದಯಗಳತ್ತ ಸಾಗಿದ ಹೆಜ್ಜೆಗಳ
ಪರಿಚಯ
ಕೇರಳದ ಸಾಮಾಜಿಕ, ಧಾರ್ಮಿಕ ಮತ್ತು ರಾಜಕೀಯ ಇತಿಹಾಸದಲ್ಲಿ ಅಳಿಸಲಾಗದ ಹೆಜ್ಜೆಗುರುತು ಮೂಡಿಸಿದ ಮಹನೀಯರಲ್ಲಿ ಪಾಣಕ್ಕಾಡ್ ಸಯ್ಯದ್ ಮುಹಮ್ಮದ್ ಅಲಿ ಶಿಹಾಬ್ ತಂಙಳ್ ಅವರ ಹೆಸರು ಅಗ್ರಗಣ್ಯವಾಗಿದೆ. ಅವರು ಕೇವಲ ರಾಜಕೀಯ ನಾಯಕರಾಗಿರಲಿಲ್ಲ; ಅದಕ್ಕಿಂತ ಹೆಚ್ಚಾಗಿ ಸಮಾಜದ ನೋವಿಗೆ ಸ್ಪಂದಿಸುವ ಮಾನವತಾವಾದಿ, ಧಾರ್ಮಿಕ ಮಾರ್ಗದರ್ಶಕ, ಸಮನ್ವಯದ ಶಿಲ್ಪಿ ಹಾಗೂ ಲಕ್ಷಾಂತರ ಜನರ ವಿಶ್ವಾಸದ ಕೇಂದ್ರಬಿಂದುವಾಗಿದ್ದರು.
ಅವರ ಬದುಕು ಅಧಿಕಾರದ ವೈಭವಕ್ಕಿಂತ ಸೇವೆಯ ಮಹತ್ವವನ್ನು ಸಾರಿದ ಅಪೂರ್ವ ಮಾದರಿಯಾಗಿದೆ. ವಿನಮ್ರತೆ, ದಯೆ, ತಾಳ್ಮೆ, ದೂರದೃಷ್ಟಿ ಮತ್ತು ಜನಪರ ಕಾಳಜಿಯೇ ಅವರ ವ್ಯಕ್ತಿತ್ವದ ಮುಖ್ಯ ಲಕ್ಷಣಗಳಾಗಿದ್ದವು. ಸಮಾಜದ ಯಾವುದೇ ವರ್ಗದ ಜನರಾಗಲಿ, ಯಾವುದೇ ಧರ್ಮದವರಾಗಲಿ, ಯಾವುದೇ ರಾಜಕೀಯ ಪಕ್ಷದವರಾಗಲಿ ಎಲ್ಲರನ್ನೂ ಸಮಾನ ಪ್ರೀತಿ ಮತ್ತು ಗೌರವದಿಂದ ಕಾಣುವ ವಿಶಾಲ ಮನೋಭಾವವನ್ನು ಅವರು ಜೀವನದುದ್ದಕ್ಕೂ ಉಳಿಸಿಕೊಂಡಿದ್ದರು.
ಇಂಡಿಯನ್ ಯೂನಿಯನ್ ಮುಸ್ಲಿಂ ಲೀಗ್ನ ದೀರ್ಘಕಾಲದ ರಾಜ್ಯಾಧ್ಯಕ್ಷರಾಗಿ ಅವರು ಪಕ್ಷವನ್ನು ಸಂಘಟನಾತ್ಮಕವಾಗಿ ಬಲಪಡಿಸಿದಷ್ಟೇ ಅಲ್ಲ, ಪ್ರಜಾಪ್ರಭುತ್ವದ ಮೌಲ್ಯಗಳನ್ನು ಕಾಪಾಡುವಲ್ಲಿ ಮತ್ತು ಅಲ್ಪಸಂಖ್ಯಾತರ ಹಕ್ಕುಗಳನ್ನು ಸಂವಿಧಾನಾತ್ಮಕ ಚೌಕಟ್ಟಿನೊಳಗೆ ರಕ್ಷಿಸುವಲ್ಲಿ ಮಹತ್ತರ ಪಾತ್ರ ವಹಿಸಿದರು. ಕೋಮು ಸೌಹಾರ್ದ, ಸಾಮಾಜಿಕ ನ್ಯಾಯ ಮತ್ತು ರಾಷ್ಟ್ರೀಯ ಏಕತೆಯ ಪರವಾದ ಅವರ ನಿಲುವು ಎಲ್ಲರಿಂದಲೂ ಗೌರವಿಸಲ್ಪಟ್ಟಿತು.
ರಾಜಕೀಯ ಕ್ಷೇತ್ರದಾಚೆಯೂ ಅವರ ಸೇವೆಯ ವಿಸ್ತಾರ ಅಪಾರವಾಗಿತ್ತು. ಶಿಕ್ಷಣ ಸಂಸ್ಥೆಗಳ ಸ್ಥಾಪನೆ, ಧಾರ್ಮಿಕ ಶಿಕ್ಷಣದ ಅಭಿವೃದ್ಧಿ, ಸಮಾಜದ ಸಂಘಟನೆ, ಅನಾಥರು ಹಾಗೂ ನಿರ್ಗತಿಕರ ಪುನರ್ವಸತಿ, ಬಡವರ ಸಂಕಷ್ಟಗಳಿಗೆ ಸ್ಪಂದನೆ ಇವೆಲ್ಲವೂ ಅವರ ಜೀವನಸೇವೆಯ ಅವಿಭಾಜ್ಯ ಅಂಗಗಳಾಗಿದ್ದವು. ಮಾತ್ರವಲ್ಲ ಅನೇಕ ಮಸೀದಿಗಳು, ಮದ್ರಸಾಗಳು, ಶೈಕ್ಷಣಿಕ ಸಂಸ್ಥೆಗಳು ಮತ್ತು ದತ್ತಿ ಕಾರ್ಯಗಳು ಅವರ ಮಾರ್ಗದರ್ಶನದಲ್ಲಿ ಬೆಳೆದು ಸಮಾಜಕ್ಕೆ ಅಪಾರ ಸೇವೆ ಸಲ್ಲಿಸಿವೆ. ಅವರ ಬದುಕಿನ ಆದರ್ಶಗಳು ಇಂದಿನ ಪೀಳಿಗೆಗೂ ದಾರಿದೀಪವಾಗಿವೆ.
'ಜನನ ಮತ್ತು ಬಾಲ್ಯ'
ಪಾಣಕ್ಕಾಡ್ ಸಯ್ಯದ್ ಮುಹಮ್ಮದ್ ಅಲಿ ಶಿಹಾಬ್ ತಂಙಳ್ ಅವರು 1936 ರ ಮೇ 4ರಂದು ಮಲಪ್ಪುರಂ ಜಿಲ್ಲೆಯ ಪಾಣಕ್ಕಾಡ್ನ ಪ್ರಸಿದ್ಧ ಸಯ್ಯದ್ ಕುಟುಂಬದಲ್ಲಿ ಜನಿಸಿದರು. ಧಾರ್ಮಿಕ ಪಾಂಡಿತ್ಯ, ಆಧ್ಯಾತ್ಮಿಕ ಪರಂಪರೆ ಮತ್ತು ಸಾಮಾಜಿಕ ಸೇವೆಗೆ ಹೆಸರುವಾಸಿಯಾದ ಈ ಕುಟುಂಬವು ಕೇರಳದ ಮುಸ್ಲಿಂ ಸಮುದಾಯದಲ್ಲಿ ವಿಶಿಷ್ಟ ಸ್ಥಾನವನ್ನು ಹೊಂದಿದೆ.
ಅವರ ತಂದೆ ಪಾಣಕ್ಕಾಡ್ ಸಯ್ಯದ್ ಅಹ್ಮದ್ ಪೂಕೋಯ ತಂಙಳ್ ಅವರು ಕೇರಳದ ಗೌರವಾನ್ವಿತ ಧಾರ್ಮಿಕ ಹಾಗೂ ಸಾಮಾಜಿಕ ನಾಯಕರಾಗಿದ್ದರು. ಬಾಲ್ಯದಿಂದಲೇ ಶಿಹಾಬ್ ತಂಙಳ್ ಅವರಿಗೆ ಧಾರ್ಮಿಕ ಮೌಲ್ಯಗಳು, ವಿನಯಶೀಲತೆ, ಸೇವಾಮನೋಭಾವ ಮತ್ತು ಜನರೊಂದಿಗೆ ಬೆರೆಯುವ ಗುಣಗಳು ಕುಟುಂಬದ ವಾತಾವರಣದಲ್ಲಿಯೇ ಬೆಳೆದುಬಂದವು.
ಪ್ರಾಥಮಿಕ ಶಿಕ್ಷಣವನ್ನು ಕೋಝಿಕ್ಕೋಡ್ನ (ಕಲ್ಲಿಕೋಟೆ) ಮದ್ರಸತುಲ್ ಮುಹಮ್ಮದಿಯ್ಯಾ ಶಾಲೆಯಲ್ಲಿ ಪಡೆದ ಅವರು, ಬಳಿಕ ಪ್ರಸಿದ್ಧ ವಿದ್ವಾಂಸರ ಮಾರ್ಗದರ್ಶನದಲ್ಲಿ ದರ್ಸ್ ಶಿಕ್ಷಣವನ್ನು ಅಭ್ಯಾಸ ಮಾಡಿದರು. ಬಾಲ್ಯದಲ್ಲಿಯೇ ಅಪಾರ ಜ್ಞಾನ ಸವೆಯುವ ಆಸೆ, ತೀಕ್ಷ್ಣ ಗ್ರಹಿಕೆ ಮತ್ತು ಅಧ್ಯಯನದ ಆಸಕ್ತಿಯನ್ನು ಅವರು ಪ್ರದರ್ಶಿಸಿದ್ದರು.
ಉನ್ನತ ಧಾರ್ಮಿಕ ಶಿಕ್ಷಣಕ್ಕಾಗಿ ಅವರು ಈಜಿಪ್ಟ್ಗೆ ತೆರಳಿ ಅಲ್-ಅಝ್ಹರ್ ವಿಶ್ವವಿದ್ಯಾಲಯದಲ್ಲಿ ಅರಬಿಕ್ ಸಾಹಿತ್ಯವನ್ನು ಅಭ್ಯಾಸ ಮಾಡಿದರು. ಬಳಿಕ ಕೈರೋ ವಿಶ್ವವಿದ್ಯಾಲಯದಲ್ಲಿಯೂ ತಮ್ಮ ಅಧ್ಯಯನವನ್ನು ಮುಂದುವರಿಸಿದರು. ವಿದೇಶದಲ್ಲಿ ಪಡೆದ ಈ ಉನ್ನತ ಶಿಕ್ಷಣವು ಅವರ ವ್ಯಕ್ತಿತ್ವಕ್ಕೆ ಹೊಸ ಆಯಾಮವನ್ನು ನೀಡಿತು. ವಿಶಾಲ ದೃಷ್ಟಿಕೋನ, ಆಳವಾದ ಧಾರ್ಮಿಕ ಪಾಂಡಿತ್ಯ ಮತ್ತು ಸಮಾಜಮುಖಿ ಚಿಂತನೆಗಳು ಈ ಅವಧಿಯಲ್ಲಿ ಮತ್ತಷ್ಟು ದೃಢವಾದವು.
1966ರಲ್ಲಿ ಸ್ವದೇಶಕ್ಕೆ ಮರಳಿದ ಬಳಿಕ ಅವರು ಸಾರ್ವಜನಿಕ ಜೀವನದಲ್ಲಿ ಸಕ್ರಿಯರಾದರು. ಶಿಕ್ಷಣ, ಧಾರ್ಮಿಕ ಮಾರ್ಗದರ್ಶನ ಮತ್ತು ಸಾಮಾಜಿಕ ಸೇವೆಯನ್ನು ಜೀವನದ ಧ್ಯೇಯವನ್ನಾಗಿ ಮಾಡಿಕೊಂಡ ಅವರು ಕ್ರಮೇಣ ಕೇರಳದ ಮುಸ್ಲಿಂ ಸಮುದಾಯದ ಅತ್ಯಂತ ವಿಶ್ವಾಸಾರ್ಹ ನಾಯಕರಾಗಿ ಹೆಸರುವಾಸಿಯಾದರು.
'ಶಿಕ್ಷಣ ಮತ್ತು ಜ್ಞಾನಾರ್ಜನೆ'
ಪಾಣಕ್ಕಾಡ್ ಸಯ್ಯದ್ ಮುಹಮ್ಮದ್ ಅಲಿ ಶಿಹಾಬ್ ತಂಙಳ್ ಅವರ ವ್ಯಕ್ತಿತ್ವದ ಭದ್ರ ಅಡಿಪಾಯ ಅವರ ಶಿಕ್ಷಣ ಜೀವನದಲ್ಲಿಯೇ ರೂಪುಗೊಂಡಿತು. ಬಾಲ್ಯದಿಂದಲೇ ಜ್ಞಾನಾರ್ಜನೆಯ ಬಗ್ಗೆ ಅಪಾರ ಆಸಕ್ತಿ ಹೊಂದಿದ್ದ ಅವರು ಲೌಕಿಕ ಹಾಗೂ ಧಾರ್ಮಿಕ ಶಿಕ್ಷಣ ಎರಡಕ್ಕೂ ಸಮಾನ ಪ್ರಾಮುಖ್ಯತೆ ನೀಡಿದರು.
ಪ್ರಾಥಮಿಕ ಶಿಕ್ಷಣವನ್ನು ಕೋಝಿಕ್ಕೋಡ್ನ ಮದ್ರಸತುಲ್ ಮುಹಮ್ಮದಿಯ್ಯಾ ಶಾಲೆಯಲ್ಲಿ ಪೂರ್ಣಗೊಳಿಸಿದ ಬಳಿಕ ಅವರು ಪ್ರಸಿದ್ಧ ಉಲಮಾಗಳ ಮಾರ್ಗದರ್ಶನದಲ್ಲಿ ದರ್ಸ್ ಶಿಕ್ಷಣವನ್ನು ಆರಂಭಿಸಿದರು. ತಲಕ್ಕಾಡತ್ತೂರು ಮತ್ತು ತೋಝನ್ನೂರು ದರ್ಸ್ಗಳಲ್ಲಿ ನಡೆದ ಅವರ ಅಧ್ಯಯನವು ಕುರ್ಆನ್, ಹದೀಸ್, ಫಿಖ್ಹ್, ಅರೇಬಿಕ್ ವ್ಯಾಕರಣ ಹಾಗೂ ಇಸ್ಲಾಮಿಕ ಶಾಸ್ತ್ರಗಳ ಕುರಿತು ಆಳವಾದ ಪಾಂಡಿತ್ಯವನ್ನು ಬೆಳೆಸಿತು.
ಉನ್ನತ ವಿದ್ಯಾಭ್ಯಾಸದ ಉದ್ದೇಶದಿಂದ 1958 ರಲ್ಲಿ ಅವರು ಈಜಿಪ್ಟ್ಗೆ ತೆರಳಿದರು. ವಿಶ್ವದ ಅತ್ಯಂತ ಪ್ರತಿಷ್ಠಿತ ಇಸ್ಲಾಮಿಕ್ ಶಿಕ್ಷಣ ಕೇಂದ್ರಗಳಲ್ಲಿ ಒಂದಾದ ಅಲ್-ಅಝ್ಹರ್ ವಿಶ್ವವಿದ್ಯಾಲಯದಲ್ಲಿ ಅರೇಬಿಕ್ ಸಾಹಿತ್ಯವನ್ನು ಅಧ್ಯಯನ ಮಾಡಿ ಉನ್ನತ ಪದವಿಯನ್ನು ಪಡೆದರು. ನಂತರ ಕೈರೋ ವಿಶ್ವವಿದ್ಯಾಲಯದಲ್ಲಿ ತಮ್ಮ ಅಧ್ಯಯನವನ್ನು ಮುಂದುವರಿಸಿ ಅರೇಬಿಕ್ ಸಾಹಿತ್ಯ ಮತ್ತು ಸಂಬಂಧಿತ ವಿಷಯಗಳಲ್ಲಿ ಆಳವಾದ ಸಂಶೋಧನೆ ನಡೆಸಿದರು.
ಈಜಿಪ್ಟ್ನಲ್ಲಿ ಕಳೆದ ಎಂಟು ವರ್ಷಗಳು ಅವರ ಜೀವನದಲ್ಲಿ ಮಹತ್ವದ ತಿರುವಾಗಿದ್ದವು. ವಿವಿಧ ದೇಶಗಳಿಂದ ಬಂದ ವಿದ್ಯಾರ್ಥಿಗಳು ಹಾಗೂ ವಿದ್ವಾಂಸರೊಂದಿಗೆ ನಡೆದ ಸಂವಾದಗಳು ಅವರ ದೃಷ್ಟಿಕೋನವನ್ನು ಇನ್ನಷ್ಟು ವಿಶಾಲಗೊಳಿಸಿದವು. ಧಾರ್ಮಿಕ ಪಾಂಡಿತ್ಯದ ಜೊತೆಗೆ ಸಮಾಜ, ರಾಜಕೀಯ, ಸಂಸ್ಕೃತಿ ಮತ್ತು ಮಾನವೀಯ ಮೌಲ್ಯಗಳ ಕುರಿತು ಸಮತೋಲನದ ಚಿಂತನೆ ಅವರಲ್ಲಿ ಬೆಳೆಯಿತು.
ಈ ಅವಧಿಯಲ್ಲಿ ಅವರು ಅನೇಕ ಖ್ಯಾತ ಪ್ರಾಧ್ಯಾಪಕರಿಂದ ಶಿಕ್ಷಣ ಪಡೆದರು. ಅವರ ಮಾರ್ಗದರ್ಶನವು ಶಿಹಾಬ್ ತಂಙಳ್ ಅವರನ್ನು ಕೇವಲ ಒಬ್ಬ ವಿದ್ಯಾರ್ಥಿಯಾಗಿ ಮಾತ್ರವಲ್ಲ, ಭವಿಷ್ಯದ ವಿದ್ವಾಂಸ ಮತ್ತು ಸಮಾಜದ ಮಾರ್ಗದರ್ಶಕರಾಗಿ ರೂಪಿಸಿತು.
ವಿದೇಶದಲ್ಲಿದ್ದರೂ ಅವರು ತಮ್ಮ ತಾಯ್ನಾಡಿನೊಂದಿಗೆ ನಿಕಟ ಸಂಬಂಧವನ್ನು ಉಳಿಸಿಕೊಂಡಿದ್ದರು. ಶಿಕ್ಷಣವು ವೈಯಕ್ತಿಕ ಸಾಧನೆಗೆ ಮಾತ್ರ ಸೀಮಿತವಾಗಿರದೆ, ಸಮಾಜದ ಒಳಿತಿಗಾಗಿ ಉಪಯೋಗವಾಗಬೇಕು ಎಂಬ ದೃಢ ನಿಲುವನ್ನು ಅವರು ಆಗಲೇ ರೂಪಿಸಿಕೊಂಡಿದ್ದರು.
1966 ರಲ್ಲಿ ಸ್ವದೇಶಕ್ಕೆ ಮರಳಿದ ನಂತರ ಅವರು ತಮ್ಮ ಜ್ಞಾನ ಮತ್ತು ಅನುಭವವನ್ನು ಸಮಾಜದ ಸೇವೆಗೆ ಸಮರ್ಪಿಸಿದರು. ಶಿಕ್ಷಣ ಸಂಸ್ಥೆಗಳ ಅಭಿವೃದ್ಧಿ, ಧಾರ್ಮಿಕ ಬೋಧನೆ ಮತ್ತು ಸಾಮಾಜಿಕ ಜಾಗೃತಿಯ ಕ್ಷೇತ್ರಗಳಲ್ಲಿ ಅವರು ನಿರಂತರವಾಗಿ ತೊಡಗಿಸಿಕೊಂಡರು. ಅವರ ದೃಷ್ಟಿಯಲ್ಲಿ ಶಿಕ್ಷಣವೆಂದರೆ ಕೇವಲ ಪದವಿ ಪಡೆಯುವುದಲ್ಲ; ಅದು ವ್ಯಕ್ತಿತ್ವವನ್ನು ರೂಪಿಸುವ ಮತ್ತು ಸಮಾಜವನ್ನು ಉನ್ನತಿಗೇರಿಸುವ ಶಕ್ತಿಯಾಗಿತ್ತು.
'ವೈವಾಹಿಕ ಜೀವನ'
ಶೈಕ್ಷಣಿಕ ಜೀವನವನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದ ಬಳಿಕ ಪಾಣಕ್ಕಾಡ್ ಸಯ್ಯದ್ ಮುಹಮ್ಮದ್ ಅಲಿ ಶಿಹಾಬ್ ತಂಙಳ್ ಅವರು ಪ್ರಸಿದ್ಧ ಧಾರ್ಮಿಕ ಮತ್ತು ರಾಜಕೀಯ ನಾಯಕ ಖಾಯಿದುಲ್ ಖೌಂ ಸಯ್ಯದ್ ಅಬ್ದುರ್ರಹ್ಮಾನ್ ಬಾಫಖಿ ತಂಙಳ್ ಅವರ ಪುತ್ರಿ ಶರೀಫಾ ಫಾತಿಮಾ ಬೀವಿಯವರನ್ನು ಮದುವೆಯಾದರು. ಈ ವೈವಾಹಿಕ ಸಂಬಂಧವು ಎರಡು ಗೌರವಾನ್ವಿತ ಸಯ್ಯದ್ ಕುಟುಂಬಗಳ ಸಂಬಂಧವನ್ನು ಮತ್ತಷ್ಟು ಸುದೃಢಗೊಳಿಸಿತು.
ಕುಟುಂಬ ಜೀವನದಲ್ಲಿಯೂ ಶಿಹಾಬ್ ತಂಙಳ್ ಅವರು ಆದರ್ಶ ವ್ಯಕ್ತಿತ್ವವನ್ನು ಪ್ರದರ್ಶಿಸಿದರು. ಸಾರ್ವಜನಿಕ ಜೀವನದ ಅನೇಕ ಜವಾಬ್ದಾರಿಗಳ ನಡುವೆಯೂ ಕುಟುಂಬದ ಸದಸ್ಯರ ಬಗ್ಗೆ ಅಪಾರ ಕಾಳಜಿ ಮತ್ತು ಪ್ರೀತಿಯನ್ನು ಹೊಂದಿದ್ದರು. ಅವರ ಮನೆಯಲ್ಲಿ ಸರಳತೆ, ಧಾರ್ಮಿಕ ಶಿಸ್ತು ಮತ್ತು ಅತಿಥಿ ಸತ್ಕಾರ ಪ್ರಮುಖ ಗುಣಗಳಾಗಿದ್ದವು.
ಅವರ ಮೊದಲ ಪತ್ನಿಯವರ ನಿಧನದ ಬಳಿಕ ಅವರು ಆಯಿಷಾ ಬೀವಿಯವರನ್ನು ವಿವಾಹವಾದರು. ಜೀವನದ ಏರುಪೇರುಗಳನ್ನು ಅಲ್ಲಾಹನ ಮೇಲಿನ ಸಂಪೂರ್ಣ ಭರವಸೆಯೊಂದಿಗೆ ಸ್ವೀಕರಿಸಿದ ಅವರು, ಕುಟುಂಬ ಮತ್ತು ಸಮಾಜ ಎರಡಕ್ಕೂ ಸಮಾನ ಜವಾಬ್ದಾರಿಯನ್ನು ನಿರ್ವಹಿಸಿದರು.
ಅವರ ಸಂತಾನ ಹಾಗೂ ಕುಟುಂಬಸ್ಥರು ಶಿಕ್ಷಣ, ಧಾರ್ಮಿಕ ಸೇವೆ ಮತ್ತು ಸಾರ್ವಜನಿಕ ಬದುಕಿನ ವಿವಿಧ ಕ್ಷೇತ್ರಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದಾರೆ. ಪಾಣಕ್ಕಾಡ್ ಕುಟುಂಬವು ಇಂದಿಗೂ ಕೇರಳದ ಧಾರ್ಮಿಕ ಹಾಗೂ ಸಾಮಾಜಿಕ ಬದುಕಿನಲ್ಲಿ ಪ್ರಮುಖ ಸ್ಥಾನವನ್ನು ಅಲಂಕರಿಸಿದೆ.
'ಧಾರ್ಮಿಕ ನಾಯಕತ್ವ ಮತ್ತು ರಾಜಕೀಯ ಪ್ರಜ್ಞೆಯ ಅಪೂರ್ವ ಸಂಗಮ'
ಪಾಣಕ್ಕಾಡ್ ಸಯ್ಯದ್ ಮುಹಮ್ಮದ್ ಅಲಿ ಶಿಹಾಬ್ ತಂಙಳ್ ಅವರ ವ್ಯಕ್ತಿತ್ವದ ಮಹತ್ವವು ಅವರು ವಹಿಸಿದ್ದ ಕೇವಲ ಹುದ್ದೆಗಳಲ್ಲಾಗಿರಲಿಲ್ಲ; ಬದಲಾಗಿ ಜನರ ಹೃದಯಗಳಲ್ಲಿ ಗಳಿಸಿದ್ದ ವಿಶ್ವಾಸದಲ್ಲಾಗಿತ್ತು. ಧಾರ್ಮಿಕ ಮಾರ್ಗದರ್ಶಕರಾಗಿಯೂ ರಾಜಕೀಯ ನಾಯಕರಾಗಿಯೂ ಅವರು ನಿರ್ವಹಿಸಿದ ಜವಾಬ್ದಾರಿಗಳು ಪರಸ್ಪರ ಪೂರಕವಾಗಿದ್ದವು. ಇವೆರಡನ್ನೂ ಅವರು ಸಮಾಜದ ಒಳಿತಿಗಾಗಿ ಬಳಸಿಕೊಂಡರು.
1975 ರಲ್ಲಿ ತಂದೆ ಪಾಣಕ್ಕಾಡ್ ಸಯ್ಯದ್ ಅಹ್ಮದ್ ಪೂಕೋಯ ತಂಙಳ್ ಅವರ ನಿಧನದ ಬಳಿಕ, ಇಂಡಿಯನ್ ಯೂನಿಯನ್ ಮುಸ್ಲಿಂ ಲೀಗ್ನ ಕೇರಳ ರಾಜ್ಯಾಧ್ಯಕ್ಷರ ಜವಾಬ್ದಾರಿ ಅವರ ಹೆಗಲೇರಿತು. ಆ ಸಮಯದಲ್ಲಿ ಪಕ್ಷವು ಹಲವಾರು ಸವಾಲುಗಳನ್ನು ಎದುರಿಸುತ್ತಿದ್ದರೂ, ಶಿಹಾಬ್ ತಂಙಳ್ ಅವರ ಶಾಂತ, ಸಮತೋಲಿತ ಮತ್ತು ದೂರದೃಷ್ಟಿಯ ನಾಯಕತ್ವವು ಪಕ್ಷಕ್ಕೆ ಹೊಸ ಚೈತನ್ಯವನ್ನು ತುಂಬಿತು.
ಅವರು ರಾಜಕೀಯವನ್ನು ಅಧಿಕಾರದ ಅವಕಾಶವಾಗಿ ಕಾಣಲಿಲ್ಲ; ಹೊರತು ಸಮಾಜಸೇವೆಯ ಹೊಣೆಗಾರಿಕೆಯೆಂದು ಪರಿಗಣಿಸಿದರು. ಅಲ್ಪಸಂಖ್ಯಾತರ ಹಕ್ಕುಗಳ ರಕ್ಷಣೆ, ಶಿಕ್ಷಣದ ವಿಸ್ತರಣೆ, ಸಾಮಾಜಿಕ ನ್ಯಾಯದ ಸ್ಥಾಪನೆ ಹಾಗೂ ರಾಷ್ಟ್ರೀಯ ಐಕ್ಯದ ಬಲವರ್ಧನೆ ಅವರ ರಾಜಕೀಯ ಧ್ಯೇಯಗಳಾಗಿದ್ದವು.
ಅವರ ನಾಯಕತ್ವದ ಅತ್ಯಂತ ಗಮನಾರ್ಹ ಗುಣವೆಂದರೆ ಸಂವಾದ ಮತ್ತು ಸಮನ್ವಯ. ಭಿನ್ನಾಭಿಪ್ರಾಯಗಳು ಎದುರಾದಾಗ ಅವರು ಸಂಘರ್ಷಕ್ಕಿಂತ ಸಂಭಾಷಣೆಗೆ ಆದ್ಯತೆ ನೀಡುತ್ತಿದ್ದರು. ಕೋಪ, ವಿದ್ವೇಷ ಮತ್ತು ಉದ್ವಿಗ್ನತೆಯ ಬದಲಾಗಿ ತಾಳ್ಮೆ, ಶಾಂತಿ ಮತ್ತು ಪರಸ್ಪರ ಗೌರವವನ್ನು ಅವರು ಪ್ರತಿಪಾದಿಸುತ್ತಿದ್ದರು. ಆದ್ದರಿಂದಲೇ ಅವರು ಕೇವಲ ಮುಸ್ಲಿಂ ಸಮುದಾಯದ ನಾಯಕರಾಗಿರದೆ, ವಿವಿಧ ಧರ್ಮ ಮತ್ತು ರಾಜಕೀಯ ಹಿನ್ನೆಲೆಯ ನಾಯಕರ ವಿಶ್ವಾಸವನ್ನೂ ಗಳಿಸಿದ್ದರು.
ಕೇರಳದ ನೂರಾರು ಮಹಲ್ಲುಗಳಿಗೆ ಖಾಝಿಯಾಗಿ ಸೇವೆ ಸಲ್ಲಿಸಿದ ಅವರು ಧಾರ್ಮಿಕ ಬದುಕಿನಲ್ಲಿ ಮಾರ್ಗದರ್ಶಕರಾಗಿದ್ದರು. ಕುಟುಂಬ ಕಲಹಗಳು, ಸಾಮಾಜಿಕ ಸಮಸ್ಯೆಗಳು ಮತ್ತು ವೈಯಕ್ತಿಕ ವಿವಾದಗಳನ್ನು ನ್ಯಾಯಯುತವಾಗಿ ಬಗೆಹರಿಸುವಲ್ಲಿ ಅವರ ತೀರ್ಪುಗಳಿಗೆ ಅಪಾರ ಗೌರವವಿತ್ತು. ಅವರ ಬಳಿಗೆ ಬರುವವರು ನ್ಯಾಯ ಮತ್ತು ಸಮಾಧಾನದ ಭರವಸೆಯೊಂದಿಗೆ ಹಿಂದಿರುಗುತ್ತಿದ್ದರು.
ಅವರು ಶಿಕ್ಷಣ ಸಂಸ್ಥೆಗಳ ಬೆಳವಣಿಗೆಯಲ್ಲಿಯೂ ಅಪಾರ ಆಸಕ್ತಿ ವಹಿಸಿದರು. ಧಾರ್ಮಿಕ ಶಿಕ್ಷಣದ ಜೊತೆಗೆ ಆಧುನಿಕ ವಿದ್ಯಾಭ್ಯಾಸವೂ ಸಮುದಾಯದ ಪ್ರಗತಿಗೆ ಅನಿವಾರ್ಯ ಎಂಬುದನ್ನು ಅವರು ದೃಢವಾಗಿ ನಂಬಿದ್ದರು. ಈ ಕಾರಣದಿಂದ ಚೆಮ್ಮಾಡ್ ದಾರುಲ್ ಹುದಾ ವಿಶ್ವವಿದ್ಯಾಲಯವು ಸೇರಿ ಮತ್ತಷ್ಟು ಅನೇಕ ಶಾಲಾ-ಕಾಲೇಜುಗಳು ಮತ್ತು ಉನ್ನತ ಶಿಕ್ಷಣ ಸಂಸ್ಥೆಗಳ ಅಭಿವೃದ್ಧಿಗೆ ಅವರ ಮಾರ್ಗದರ್ಶನ ದೊರೆಯಿತು.
ಸಮಾಜದಲ್ಲಿ ಶಾಂತಿ ಮತ್ತು ಸೌಹಾರ್ದ ನೆಲೆಸಬೇಕಾದರೆ ಶಿಕ್ಷಣ, ಧರ್ಮ ಮತ್ತು ರಾಜಕೀಯ ಪರಸ್ಪರ ವಿರೋಧಿಗಳಾಗದೆ, ಪರಸ್ಪರ ಪೂರಕ ಶಕ್ತಿಗಳಾಗಬೇಕು ಎಂಬುದು ಅವರ ದೃಢ ನಿಲುವಾಗಿತ್ತು. ತಮ್ಮ ಸಂಪೂರ್ಣ ಜೀವನದ ಮೂಲಕ ಅವರು ಈ ಸಂದೇಶವನ್ನೇ ಜನರಿಗೆ ನೀಡಿದರು.
'ಕರುಣೆ ಮತ್ತು ಮಾನವೀಯತೆಯ ಪ್ರತಿರೂಪ'
ಪಾಣಕ್ಕಾಡ್ ಸಯ್ಯದ್ ಮುಹಮ್ಮದ್ ಅಲಿ ಶಿಹಾಬ್ ತಂಙಳ್ ಅವರ ಬದುಕಿನ ಅತ್ಯಂತ ಆಕರ್ಷಕ ಅಂಶವೆಂದರೆ ಅವರ ಮಾನವೀಯತೆ. ಸಮಾಜದ ಪ್ರತಿಯೊಬ್ಬ ವ್ಯಕ್ತಿಯ ದುಃಖವನ್ನು ತಮ್ಮದೇ ನೋವಿನಂತೆ ಕಾಣುವ ಅಪರೂಪದ ಗುಣ ಅವರಲ್ಲಿತ್ತು.
ಪ್ರತಿದಿನ ನೂರಾರು ಜನರು ತಮ್ಮ ವೈಯಕ್ತಿಕ, ಕುಟುಂಬ ಹಾಗೂ ಸಾಮಾಜಿಕ ಸಮಸ್ಯೆಗಳೊಂದಿಗೆ ಅವರನ್ನು ಭೇಟಿಯಾಗುತ್ತಿದ್ದರು. ಪ್ರತಿಯೊಬ್ಬರ ಮಾತನ್ನೂ ಅವರು ತಾಳ್ಮೆಯಿಂದ ಆಲಿಸುತ್ತಿದ್ದರು. ಯಾರನ್ನೂ ನಿರ್ಲಕ್ಷಿಸದೆ, ಅವರ ಪರಿಸ್ಥಿತಿಯನ್ನು ಅರ್ಥಮಾಡಿಕೊಂಡು ಸೂಕ್ತ ಸಲಹೆ ಮತ್ತು ಸಾಂತ್ವನ ನೀಡುತ್ತಿದ್ದರು.
ವಾರದ ನಿರ್ದಿಷ್ಟ ದಿನಗಳಲ್ಲಿ ಜನರ ಅಹವಾಲುಗಳನ್ನು ಆಲಿಸುವುದಕ್ಕಾಗಿ ವಿಶೇಷ ಸಮಯವನ್ನು ಮೀಸಲಿಟ್ಟಿದ್ದರು. ಅನೇಕ ಸಂದರ್ಭಗಳಲ್ಲಿ ಈ ಭೇಟಿಗಳು ಮಧ್ಯರಾತ್ರಿಯವರೆಗೂ ಮುಂದುವರಿಯುತ್ತಿದ್ದವು. ಆದರೂ ಅವರ ಮುಖದಲ್ಲಿ ಆಯಾಸದ ಛಾಯೆ ಕಾಣಿಸುತ್ತಿರಲಿಲ್ಲ. ಸಮಾಜದ ನೋವಿಗೆ ಸ್ಪಂದಿಸುವುದನ್ನೇ ಅವರು ತಮ್ಮ ಜೀವನದ ಧರ್ಮವೆಂದು ಭಾವಿಸಿದ್ದರು.
ಬಡವರು, ಅನಾಥರು, ವಿಧವೆಯರು ಮತ್ತು ನಿರ್ಗತಿಕರ ಬದುಕಿಗೆ ಆಶಾಕಿರಣವಾಗುವುದು ಅವರ ಜೀವನದ ಪ್ರಮುಖ ಧ್ಯೇಯವಾಗಿತ್ತು. ಪ್ರಕೃತಿ ವಿಕೋಪಗಳು ಮತ್ತು ಕೋಮು ಗಲಭೆಗಳಂತಹ ಸಂಕಷ್ಟದ ಸಂದರ್ಭಗಳಲ್ಲಿ ಅವರು ಸಂತ್ರಸ್ತರ ನೆರವಿಗೆ ಧಾವಿಸುತ್ತಿದ್ದರು. ಧರ್ಮ, ಜಾತಿ ಅಥವಾ ರಾಜಕೀಯ ನಿಲುವು ಅವರ ಸೇವೆಗೆ ಎಂದಿಗೂ ಅಡ್ಡಿಯಾಗಲಿಲ್ಲ.
ಅವರ ಸರಳ ನಗು, ಮೃದು ಮಾತು ಮತ್ತು ಆತ್ಮೀಯ ನಡೆ ಅನೇಕ ಕಠಿಣ ಮನಸ್ಸುಗಳನ್ನೂ ಕರಗಿಸುತ್ತಿತ್ತು. ಕೋಪ ಮತ್ತು ವೈಮನಸ್ಸಿನಿಂದ ಬಂದವರು ಸಹ ಅವರೊಂದಿಗೆ ಕೆಲವೇ ಕ್ಷಣ ಮಾತನಾಡಿದ ನಂತರ ಸಮಾಧಾನದ ಮನೋಭಾವದಿಂದ ಹಿಂದಿರುಗುತ್ತಿದ್ದರು.
ಅವರು ಪದೇಪದೇ ಹೇಳುತ್ತಿದ್ದ ಸಂದೇಶ ಒಂದೇ ಪ್ರೀತಿ ಮತ್ತು ಕರುಣೆ ಇದು ಮಾನವನ ಅತ್ಯಂತ ದೊಡ್ಡ ಶಕ್ತಿಗಳು. ದ್ವೇಷವು ಸಮಾಜವನ್ನು ಒಡೆಯುತ್ತದೆ; ಪ್ರೀತಿ ಅದನ್ನು ಒಂದಾಗಿಸುತ್ತದೆ.
ಆದ್ದರಿಂದಲೇ ಶಿಹಾಬ್ ತಂಙಳ್ ಅವರು ಕೇವಲ ರಾಜಕೀಯ ನಾಯಕ ಅಥವಾ ಧಾರ್ಮಿಕ ವಿದ್ವಾಂಸರಾಗಿ ಮಾತ್ರವಲ್ಲ, ಮಾನವೀಯತೆಯ ಜೀವಂತ ಪ್ರತಿರೂಪವಾಗಿ ಜನಮನಗಳಲ್ಲಿ ಶಾಶ್ವತ ಸ್ಥಾನ ಪಡೆದಿದ್ದಾರೆ.
'ಸಮಸ್ತ ಕೇರಳ ಜಂಇಯ್ಯತುಲ್ ಉಲಮಾದೊಂದಿಗೆ ನಿಕಟ ಬಾಂಧವ್ಯ'
ಪಾಣಕ್ಕಾಡ್ ಸಯ್ಯದ್ ಮುಹಮ್ಮದ್ ಅಲಿ ಶಿಹಾಬ್ ತಂಙಳ್ ಅವರ ಜೀವನವು ಕೇರಳದ ಸುನ್ನೀ ಚಳವಳಿಯೊಂದಿಗೆ ಅವಿನಾಭಾವವಾಗಿ ಬೆಸೆದುಕೊಂಡಿತ್ತು. ವಿಶೇಷವಾಗಿ ಸಮಸ್ತ ಕೇರಳ ಜಂಇಯ್ಯತುಲ್ ಉಲಮಾದೊಂದಿಗೆ ಅವರ ಸಂಬಂಧವು ಪರಸ್ಪರ ಗೌರವ, ವಿಶ್ವಾಸ ಮತ್ತು ಸಹಕಾರದ ಮೇಲೆ ಆಧಾರಿತವಾಗಿತ್ತು. ಸಂಘಟನೆಯ ಆಡಳಿತಾತ್ಮಕ ಜವಾಬ್ದಾರಿಗಳನ್ನು ಅವರು ನೇರವಾಗಿ ವಹಿಸದಿದ್ದರೂ, ಅದರ ಚಿಂತನೆ, ಮಾರ್ಗದರ್ಶನ ಮತ್ತು ಬೆಳವಣಿಗೆಗೆ ಅವರು ನೀಡಿದ ಕೊಡುಗೆ ಅನನ್ಯವಾಗಿತ್ತು.
ಶಂಸುಲ್ ಉಲಮಾ, ಶೈಖುನಾ ಕಣ್ಣಿಯ್ಯತ್ ಉಸ್ತಾದರ ಹಾಗೆಯೇ ಇನ್ನಷ್ಟು ಸಮಸ್ತದ ಹಿರಿಯ ಉಲಮಾಗಳೊಂದಿಗೆ ಅವರು ಅತ್ಯಂತ ಆತ್ಮೀಯ ಸಂಬಂಧವನ್ನು ಹೊಂದಿದ್ದರು. ಪ್ರಮುಖ ಧಾರ್ಮಿಕ ವಿಷಯಗಳು, ಸಮುದಾಯದ ಹಿತಾಸಕ್ತಿ ಹಾಗೂ ಶಿಕ್ಷಣ ಕ್ಷೇತ್ರದ ಅಭಿವೃದ್ಧಿಗೆ ಸಂಬಂಧಿಸಿದ ವಿಚಾರಗಳಲ್ಲಿ ಅವರ ಅಭಿಪ್ರಾಯಕ್ಕೆ ವಿಶೇಷ ಮಹತ್ವ ನೀಡಲಾಗುತ್ತಿತ್ತು. ಉಲಮಾಗಳನ್ನು ಗೌರವಿಸುವುದು ಮತ್ತು ಅವರ ಮಾರ್ಗದರ್ಶನವನ್ನು ಅನುಸರಿಸುವುದು ಅವರ ವ್ಯಕ್ತಿತ್ವದ ಪ್ರಮುಖ ಲಕ್ಷಣವಾಗಿತ್ತು.
ಕೇರಳದ ಸುನ್ನೀ ಸಮಾಜದಲ್ಲಿ ಐಕ್ಯತೆ ಮತ್ತು ಶಿಸ್ತನ್ನು ಕಾಪಾಡುವಲ್ಲಿ ಅವರು ನಿರಂತರವಾಗಿ ಶ್ರಮಿಸಿದರು. ಭಿನ್ನಾಭಿಪ್ರಾಯಗಳು ಉದ್ಭವಿಸಿದ ಸಂದರ್ಭಗಳಲ್ಲಿಯೂ ಅವರು ವಿವೇಕ, ತಾಳ್ಮೆ ಮತ್ತು ಸಂವಾದದ ಮೂಲಕ ಪರಿಹಾರ ಕಂಡುಕೊಳ್ಳಲು ಪ್ರಯತ್ನಿಸುತ್ತಿದ್ದರು. ಸಮಾಜದಲ್ಲಿ ವಿಭಜನೆಗಿಂತ ಒಗ್ಗಟ್ಟೇ ಹೆಚ್ಚಿನ ಶಕ್ತಿಯಾಗಿದೆ ಎಂಬುದನ್ನು ಅವರು ತಮ್ಮ ಜೀವನದುದ್ದಕ್ಕೂ ಸಾರಿದರು.
ಮದ್ರಸಾ ಶಿಕ್ಷಣದ ಬಲವರ್ಧನೆ, ದರ್ಸ್ ಪರಂಪರೆಯ ಸಂರಕ್ಷಣೆ ಹಾಗೂ ಉಲಮಾಗಳಿಗೆ ಅಗತ್ಯವಾದ ಪ್ರೋತ್ಸಾಹ ನೀಡುವಲ್ಲಿ ಅವರ ಪಾತ್ರ ಗಮನಾರ್ಹವಾಗಿತ್ತು. ಧಾರ್ಮಿಕ ಶಿಕ್ಷಣವು ಸಮಾಜದ ನೈತಿಕ ಮತ್ತು ಆಧ್ಯಾತ್ಮಿಕ ಬೆಳವಣಿಗೆಯ ಮೂಲಾಧಾರವೆಂದು ಅವರು ದೃಢವಾಗಿ ನಂಬಿದ್ದರು.
'ಶಿಕ್ಷಣ ಕ್ಷೇತ್ರಕ್ಕೆ ನೀಡಿದ ಅಪಾರ ಕೊಡುಗೆ'
ಶಿಹಾಬ್ ತಂಙಳ್ ಅವರ ದೃಷ್ಟಿಯಲ್ಲಿ ಶಿಕ್ಷಣವು ಸಮಾಜ ಪರಿವರ್ತನೆಯ ಅತ್ಯಂತ ಪರಿಣಾಮಕಾರಿ ಆಯುಧವಾಗಿತ್ತು. ಶಿಕ್ಷಣವಿಲ್ಲದೆ ಯಾವುದೇ ಸಮುದಾಯವು ಶಾಶ್ವತ ಪ್ರಗತಿಯನ್ನು ಸಾಧಿಸಲು ಸಾಧ್ಯವಿಲ್ಲ ಎಂಬುದನ್ನು ಅವರು ಆಳವಾಗಿ ಮನಗಂಡಿದ್ದರು.
ಧಾರ್ಮಿಕ ಶಿಕ್ಷಣದ ಜೊತೆಗೆ ಆಧುನಿಕ ಶಿಕ್ಷಣವೂ ಸಮಾನವಾಗಿ ಬೆಳೆಯಬೇಕು ಎಂಬ ವಿಚಾರವನ್ನು ಅವರು ಎಲ್ಲೆಡೆ ಪ್ರತಿಪಾದಿಸುತ್ತಿದ್ದರು. ಈ ಕಾರಣದಿಂದ ಅನೇಕ
ಶಾಲಾ -ಕಾಲೇಜುಗಳು, ಅರೇಬಿಕ್ ಕಾಲೇಜುಗಳು ಹಾಗೂ ವೃತ್ತಿಪರ ಶಿಕ್ಷಣ ಸಂಸ್ಥೆಗಳ ಸ್ಥಾಪನೆ ಮತ್ತು ಅಭಿವೃದ್ಧಿಗೆ ಅವರು ಸಕ್ರಿಯ ಮಾರ್ಗದರ್ಶನ ನೀಡಿದರು.
ವಿಶೇಷವಾಗಿ ಬಡ ಮತ್ತು ಹಿಂದುಳಿದ ಕುಟುಂಬಗಳ ವಿದ್ಯಾರ್ಥಿಗಳಿಗೆ ಶಿಕ್ಷಣದ ಅವಕಾಶಗಳು ಲಭಿಸಬೇಕೆಂಬುದರ ಬಗ್ಗೆ ಅವರು ಅಪಾರ ಕಾಳಜಿ ವಹಿಸುತ್ತಿದ್ದರು. ಪ್ರತಿಭಾವಂತ ವಿದ್ಯಾರ್ಥಿಗಳು ಆರ್ಥಿಕ ಸಂಕಷ್ಟದಿಂದ ವಿದ್ಯಾಭ್ಯಾಸವನ್ನು ಅರ್ಧದಲ್ಲೇ ಕೈಬಿಡಬಾರದು ಎಂಬ ಆಶಯದಿಂದ ಅನೇಕ ನೆರವು ಕಾರ್ಯಕ್ರಮಗಳಿಗೆ ಅವರು ಪ್ರೋತ್ಸಾಹ ನೀಡಿದರು.
ಅವರ ಪ್ರೇರಣೆಯಿಂದ ಆರಂಭವಾದ ಹಲವಾರು ಶಿಕ್ಷಣ ಸಂಸ್ಥೆಗಳು ಇಂದು ಸಾವಿರಾರು ವಿದ್ಯಾರ್ಥಿಗಳಿಗೆ ಜ್ಞಾನವನ್ನು ಹಂಚುತ್ತಿವೆ. ಆ ಸಂಸ್ಥೆಗಳು ಕೇವಲ ವಿದ್ಯಾಭ್ಯಾಸವನ್ನು ನೀಡುವುದಲ್ಲದೆ, ನೈತಿಕತೆ, ಸಾಮಾಜಿಕ ಜವಾಬ್ದಾರಿ ಮತ್ತು ರಾಷ್ಟ್ರೀಯ ಬದ್ಧತೆಯನ್ನು ಬೆಳೆಸುವ ಕೇಂದ್ರಗಳಾಗಿ ರೂಪುಗೊಂಡಿವೆ.
ಶಿಕ್ಷಣವು ವ್ಯಕ್ತಿಯನ್ನು ಉತ್ತಮ ನಾಗರಿಕನನ್ನಾಗಿ ರೂಪಿಸಬೇಕು; ಜ್ಞಾನವು ಸಮಾಜದ ಒಳಿತಿಗೆ ಬಳಕೆಯಾಗಬೇಕು ಎಂಬುದು ಅವರ ಶಿಕ್ಷಣ ತತ್ವದ ಸಾರವಾಗಿತ್ತು.
'ಸರ್ವಧರ್ಮ ಸೌಹಾರ್ದದ ಪ್ರತಿಪಾದಕ'
ಪಾಣಕ್ಕಾಡ್ ಸಯ್ಯದ್ ಮುಹಮ್ಮದ್ ಅಲಿ ಶಿಹಾಬ್ ತಂಙಳ್ ಅವರ ಜೀವನದ ಅತ್ಯಂತ ಮಹತ್ವದ ಸಂದೇಶಗಳಲ್ಲಿ ಒಂದು ಸರ್ವಧರ್ಮ ಸೌಹಾರ್ದವಾಗಿತ್ತು. ವಿಭಿನ್ನ ಧರ್ಮಗಳು, ಸಂಸ್ಕೃತಿಗಳು ಮತ್ತು ಸಮುದಾಯಗಳ ನಡುವೆ ಪರಸ್ಪರ ಗೌರವ ಮತ್ತು ಸಹಬಾಳ್ವೆಯ ಮನೋಭಾವವನ್ನು ಬೆಳೆಸುವುದು ಅವರ ಜೀವನದ ಪ್ರಮುಖ ಗುರಿಗಳಲ್ಲೊಂದು.
ಹಿಂದೂ, ಮುಸ್ಲಿಂ, ಕ್ರೈಸ್ತ ಸೇರಿದಂತೆ ವಿವಿಧ ಧರ್ಮಗಳ ಧಾರ್ಮಿಕ ಮುಖಂಡರು ಮತ್ತು ಸಾಮಾಜಿಕ ಕಾರ್ಯಕರ್ತರೊಂದಿಗೆ ಅವರು ಆತ್ಮೀಯ ಸಂಬಂಧವನ್ನು ಹೊಂದಿದ್ದರು. ಧರ್ಮವು ಮನುಷ್ಯನನ್ನು ವಿಭಜಿಸಲು ಅಲ್ಲ; ಪರಸ್ಪರ ಅರ್ಥಮಾಡಿಕೊಳ್ಳಲು ಮತ್ತು ಒಳಿತಿನ ದಾರಿಯಲ್ಲಿ ನಡೆಯಲು ಪ್ರೇರೇಪಿಸುತ್ತದೆ ಎಂಬುದನ್ನು ಅವರು ಪದೇಪದೇ ಒತ್ತಿಹೇಳುತ್ತಿದ್ದರು.
ಶಿಹಾಬ್ ತಂಙಳ್ ಅವರ ವಿವೇಕ ಮತ್ತು ಸೌಹಾರ್ದ ಮನೋಭಾವವನ್ನು ಪ್ರತಿಬಿಂಬಿಸುವ ಮತ್ತೊಂದು ಘಟನೆ ಮಲಪ್ಪುರಂ ಜಿಲ್ಲೆಯ ಒಂದು ಗ್ರಾಮದಲ್ಲಿ ನಡೆದಿದೆ.
ಅಲ್ಲಿನ ಮಸೀದಿಯ ಪಕ್ಕದಲ್ಲಿದ್ದ ಹಿಂದೂ ಕುಟುಂಬದ ತೆಂಗಿನ ಮರದಿಂದ ಬೀಳುತ್ತಿದ್ದ ತೆಂಗಿನ ಕಾಯಿಗಳು ಮಸೀದಿಯ ಮೇಲ್ಛಾವಣಿಯ ಹೆಂಚುಗಳನ್ನು ಆಗಾಗ ಒಡೆದುಹಾಕುತ್ತಿದ್ದವು. ಇದರಿಂದ ತೊಂದರೆಗೊಳಗಾದ ಮಸೀದಿ ಆಡಳಿತ ಸಮಿತಿಯವರು ಆ ಕುಟುಂಬವನ್ನು ಭೇಟಿ ಮಾಡಿ ಮರವನ್ನು ಕಡಿದುಹಾಕುವಂತೆ ಮನವಿ ಮಾಡಿದರು. ಆದರೆ ಆ ಕುಟುಂಬವು ಅದಕ್ಕೆ ಸಮ್ಮತಿಸಲಿಲ್ಲ. ಪರಿಣಾಮವಾಗಿ ಸಮಸ್ಯೆ ದಿನೇದಿನೇ ಗಂಭೀರವಾಗತೊಡಗಿತು.
ಕೊನೆಗೆ ಸಮಿತಿಯವರು ಶಿಹಾಬ್ ತಂಙಳ್ ಅವರನ್ನು ಭೇಟಿಯಾಗಿ ಸಮಸ್ಯೆಯನ್ನು ವಿವರಿಸಿದರು.
ಎಲ್ಲವನ್ನೂ ಶಾಂತವಾಗಿ ಆಲಿಸಿದ ಅವರು, "ಮರವನ್ನು ಕಡಿದುಹಾಕುವುದು ಪರಿಹಾರವಲ್ಲ. ಅದು ಒಂದು ಜೀವಂತ ಮರ; ವರ್ಷಗಳಿಂದ ಆ ಕುಟುಂಬಕ್ಕೆ ಫಲ ನೀಡುತ್ತಿದೆ. ಅದರ ಬದಲು ಮಸೀದಿಯ ಮೇಲ್ಛಾವಣಿಯನ್ನು ಕಾಂಕ್ರೀಟ್ ಮಾಡೋಣ. ಆಗ ತೆಂಗಿನಕಾಯಿ ಬಿದ್ದರೂ ಹಾನಿಯಾಗುವುದಿಲ್ಲ" ಎಂದು ಸಲಹೆ ನೀಡಿದರು.
ಇಷ್ಟೇ ಅಲ್ಲ, ಆ ಕಾಮಗಾರಿಗೆ ಬೇಕಾಗುವ ಸಂಪೂರ್ಣ ವೆಚ್ಚವನ್ನೂ ತಾವೇ ಭರಿಸುವುದಾಗಿ ಘೋಷಿಸಿದರು.
ಈ ವಿಷಯ ತಿಳಿದ ಕುಟುಂಬದ ವೃದ್ಧೆಯೊಬ್ಬರು ಭಾವುಕರಾಗಿ ಶಿಹಾಬ್ ತಂಙಳ್ ಅವರನ್ನು ಭೇಟಿ ಮಾಡಿ, "ಮರವನ್ನು ಕಡಿಯಲು ನಾವು ಸಿದ್ಧರಿದ್ದೇವೆ, ಮಸೀದಿಗೆ ನಮ್ಮಿಂದ ಯಾವುದೇ ತೊಂದರೆಯಾಗುವುದಿಲ್ಲ" ಎಂದರು.
ಆಗ ಶಿಹಾಬ್ ತಂಙಳ್ ಮಂದಹಾಸದಿಂದ,
"ಇಲ್ಲ... ಆ ಮರವನ್ನು ಕಡಿಯಬೇಡಿ. ಅದು ಅಲ್ಲಾಹನು ನಿಮಗೆ ನೀಡಿರುವ ಉಪಜೀವನದ ಒಂದು ಮಾರ್ಗ. ಮರವನ್ನು ಉಳಿಸೋಣ; ಸಮಸ್ಯೆಯನ್ನು ಮಾತ್ರ ಪರಿಹರಿಸೋಣ."ಎಂದು ಹೇಳಿದರು.
ಈ ಘಟನೆ ಅವರ ಸಮಸ್ಯೆ ಪರಿಹರಿಸುವ ದೂರದೃಷ್ಟಿಯನ್ನೂ, ಪ್ರಕೃತಿಯ ಮೇಲಿನ ಕಾಳಜಿಯನ್ನೂ ಹಾಗೂ ಸರ್ವಧರ್ಮ ಸೌಹಾರ್ದದ ಬದ್ಧತೆಯನ್ನೂ ಸ್ಪಷ್ಟಪಡಿಸುತ್ತಿದೆ.
ಕೋಮು ಉದ್ವಿಗ್ನತೆ ಉಂಟಾದ ಸಂದರ್ಭಗಳಲ್ಲಿ ಅವರು ಶಾಂತಿ, ತಾಳ್ಮೆ ಮತ್ತು ಸಂಯಮಕ್ಕೆ ಕರೆ ನೀಡುತ್ತಿದ್ದರು. ಯಾವುದೇ ಸಮಸ್ಯೆಗೆ ಹಿಂಸೆ ಪರಿಹಾರವಲ್ಲ; ಸಂವಾದ ಮತ್ತು ನ್ಯಾಯಯುತ ಪರಿಹಾರವೇ ಶಾಶ್ವತ ಶಾಂತಿಗೆ ದಾರಿಯಾಗಿದೆ ಎಂಬುದನ್ನು ಅವರು ತಮ್ಮ ನಡೆ-ನುಡಿಗಳ ಮೂಲಕ ತೋರಿಸಿಕೊಟ್ಟರು.
ಶಿಹಾಬ್ ತಂಙಳ್ ಅವರ ಜೀವನದಲ್ಲಿ ಸರ್ವಧರ್ಮ ಸೌಹಾರ್ದವು ಕೇವಲ ಭಾಷಣಗಳ ವಿಷಯವಾಗಿರಲಿಲ್ಲ; ಅದು ಅವರ ಬದುಕಿನ ಆಚರಣೆಯಾಗಿತ್ತು.
ಒಮ್ಮೆ ಮಲಪ್ಪುರಂ ಜಿಲ್ಲೆಯ ಅಂಗಾಡಿಪುರಂ ದೇವಾಲಯದ ಪ್ರವೇಶದ್ವಾರ ಹಾನಿಗೊಳಗಾದಾಗ, ಅದರ ಹೊಣೆಯನ್ನು ಕೆಲವರು ಸ್ಥಳೀಯ ಮುಸ್ಲಿಮರ ಮೇಲೆ ಹೊರಿಸಲು ಪ್ರಯತ್ನಿಸಿದರು. ಇದರಿಂದ ಪ್ರದೇಶದಲ್ಲಿ ಉದ್ವಿಗ್ನ ವಾತಾವರಣ ನಿರ್ಮಾಣವಾಯಿತು.
ಪರಿಸ್ಥಿತಿಯ ಗಂಭೀರತೆಯನ್ನು ಅರಿತ ಶಿಹಾಬ್ ತಂಙಳ್ ಅವರು ಸ್ವತಃ ದೇವಾಲಯಕ್ಕೆ ತೆರಳಿ ಅಲ್ಲಿನ ಪ್ರಮುಖರೊಂದಿಗೆ ಮಾತುಕತೆ ನಡೆಸಿದರು. ಸಮಾಜದಲ್ಲಿ ಶಾಂತಿ ಮತ್ತು ಪರಸ್ಪರ ವಿಶ್ವಾಸ ಉಳಿಯಬೇಕೆಂಬ ಉದ್ದೇಶದಿಂದ ದೇವಾಲಯದ ಹಾನಿಗೊಳಗಾದ ಬಾಗಿಲಿನ ಮರುನಿರ್ಮಾಣಕ್ಕೆ ತಮ್ಮ ವೈಯಕ್ತಿಕ ನೆರವನ್ನು ನೀಡಿದರು.
ಅವರ ಈ ನಡೆ ಉದ್ವಿಗ್ನತೆಯನ್ನು ಶಮನಗೊಳಿಸುವುದಷ್ಟೇ ಅಲ್ಲ, ಧರ್ಮಭೇದ ಮೀರಿ ಮಾನವೀಯತೆಯನ್ನು ಗೌರವಿಸುವ ಅವರ ವಿಶಾಲ ಮನೋಭಾವಕ್ಕೂ ಸಾಕ್ಷಿಯಾಯಿತು.
ಅವರ ನಿವಾಸಕ್ಕೆ ವಿವಿಧ ಧರ್ಮಗಳ ಜನರು ಆಗಮಿಸಿ ಸಲಹೆ, ಆಶೀರ್ವಾದ ಮತ್ತು ಮಾರ್ಗದರ್ಶನ ಪಡೆಯುತ್ತಿದ್ದರು. ಧರ್ಮ, ಜಾತಿ ಅಥವಾ ರಾಜಕೀಯ ಭಿನ್ನತೆಗಳನ್ನು ಮೀರಿ ಪ್ರತಿಯೊಬ್ಬರನ್ನೂ ಸಮಾನ ಗೌರವದಿಂದ ಸ್ವಾಗತಿಸುವುದು ಅವರ ಸಹಜ ಗುಣವಾಗಿತ್ತು.
ಇದರಿಂದಲೇ ಅವರು ಕೇವಲ ಒಂದು ಸಮುದಾಯದ ನಾಯಕರಾಗಿ ಉಳಿಯದೆ, ಸಮಗ್ರ ಕೇರಳದ ಗೌರವಾನ್ವಿತ ಸಾರ್ವಜನಿಕ ವ್ಯಕ್ತಿತ್ವವಾಗಿ ಹೊರಹೊಮ್ಮಿದರು.
'ಆಧ್ಯಾತ್ಮಿಕ ಬದುಕು ಮತ್ತು ಸೂಫೀ ಚಿಂತನೆ'
ಪಾಣಕ್ಕಾಡ್ ಸಯ್ಯದ್ ಮುಹಮ್ಮದ್ ಅಲಿ ಶಿಹಾಬ್ ತಂಙಳ್ ಅವರ ವ್ಯಕ್ತಿತ್ವದ ಮೂಲಾಧಾರ ಅವರ ಆಧ್ಯಾತ್ಮಿಕ ಬದುಕಾಗಿತ್ತು. ಸಾರ್ವಜನಿಕ ಜೀವನದ ನೂರಾರು ಜವಾಬ್ದಾರಿಗಳನ್ನು ನಿರ್ವಹಿಸುತ್ತಿದ್ದರೂ, ಅಲ್ಲಾಹನೊಂದಿಗಿನ ತಮ್ಮ ಸಂಬಂಧವನ್ನು ಅವರು ಜೀವನದ ಪರಮ ಸಂಪತ್ತೆಂದು ಪರಿಗಣಿಸುತ್ತಿದ್ದರು. ಅಧಿಕಾರ, ಕೀರ್ತಿ ಮತ್ತು ಜನಪ್ರಿಯತೆ ಅವರ ಬದುಕಿನ ಗುರಿಯಾಗಿರಲಿಲ್ಲ; ಅಲ್ಲಾಹನ ಸಂತೋಷವನ್ನು ಸಂಪಾದಿಸುವುದೇ ಅವರ ಜೀವನದ ಪರಮ ಧ್ಯೇಯವಾಗಿತ್ತು.
ಸೂಫೀ ಪರಂಪರೆಯ ಮೌಲ್ಯಗಳಾದ ವಿನಯ, ಆತ್ಮಶುದ್ಧಿ, ದಯೆ, ತಾಳ್ಮೆ ಮತ್ತು ಸೇವಾಭಾವವು ಅವರ ಬದುಕಿನ ಪ್ರತಿಯೊಂದು ಹಂತದಲ್ಲಿಯೂ ಪ್ರತಿಫಲಿಸುತ್ತಿತ್ತು. ಧಿಕ್ರ್, ದುಆ, ಕುರ್ಆನ್ ಪಾರಾಯಣ ಮತ್ತು ಆರಾಧನೆಗಳಿಗೆ ಅವರು ಅಪಾರ ಮಹತ್ವ ನೀಡುತ್ತಿದ್ದರು. ತಮ್ಮ ಬಳಿಗೆ ಬರುವವರಿಗೆ ಧಾರ್ಮಿಕ ನಿಯಮಗಳನ್ನು ತಿಳಿಸುವುದಷ್ಟೇ ಅಲ್ಲದೆ, ಉತ್ತಮ ಚಾರಿತ್ರ್ಯ ಮತ್ತು ಆತ್ಮಸಂಸ್ಕರಣೆಯ ಮಹತ್ವವನ್ನೂ ಮನವರಿಕೆ ಮಾಡಿಕೊಡುತ್ತಿದ್ದರು.
ಅವರ ಮಾತುಗಳಲ್ಲಿ ಕಠೋರತೆಗಿಂತ ಕರುಣೆ, ಆಜ್ಞೆಗಿಂತ ಪ್ರೇರಣೆ ಮತ್ತು ಟೀಕೆಗಿಂತ ಆತ್ಮೀಯತೆ ಹೆಚ್ಚಾಗಿರುತ್ತಿತ್ತು. ಅದಕ್ಕಾಗಿಯೇ ವಿವಿಧ ವಯೋಮಾನದ ಜನರು ಅವರ ಮಾತುಗಳನ್ನು ಮನಃಪೂರ್ವಕವಾಗಿ ಸ್ವೀಕರಿಸುತ್ತಿದ್ದರು.
ಅವರು ಪ್ರತಿಪಾದಿಸಿದ ಆಧ್ಯಾತ್ಮಿಕತೆಯು ಸಮಾಜದಿಂದ ದೂರವಿರುವ ತಪಸ್ಸಲ್ಲ; ಸಮಾಜದ ಮಧ್ಯೆಯೇ ಬದುಕುತ್ತಾ ಅಲ್ಲಾಹನಿಗೆ ವಿಧೇಯರಾಗಿರುವ ಜೀವನವಾಗಿತ್ತು. ಕುಟುಂಬ, ಸಮಾಜ ಮತ್ತು ರಾಷ್ಟ್ರದ ಜವಾಬ್ದಾರಿಗಳನ್ನು ನಿಷ್ಠೆಯಿಂದ ನಿರ್ವಹಿಸುವುದೂ ಇಬಾದತ್ನ ಒಂದು ಭಾಗವೇ ಎಂಬ ಸಂದೇಶವನ್ನು ಆಧ್ಯಾತ್ಮಿಕ ಲೋಕಕ್ಕೆ ಅವರು ತಮ್ಮ ಜೀವನದ ಮೂಲಕ ಸಾರಿದರು.
'ಸರಳತೆ, ವಿನಯ ಮತ್ತು ಜನಸಾಮಾನ್ಯರೊಂದಿಗಿನ ಬಾಂಧವ್ಯ'
ಅತ್ಯುನ್ನತ ಸ್ಥಾನಮಾನಗಳನ್ನು ಅಲಂಕರಿಸಿದ್ದರೂ ಶಿಹಾಬ್ ತಂಙಳ್ ಅವರ ಜೀವನ ಅತ್ಯಂತ ಸರಳವಾಗಿತ್ತು. ಅಧಿಕಾರದ ಗಾಂಭೀರ್ಯಕ್ಕಿಂತ ವಿನಯವೇ ಅವರ ವ್ಯಕ್ತಿತ್ವದ ಅಲಂಕಾರವಾಗಿತ್ತು. ತಮ್ಮನ್ನು ಭೇಟಿಯಾಗಲು ಬಂದವರನ್ನು ಅವರು ಹುದ್ದೆ, ಸಂಪತ್ತು ಅಥವಾ ಸಾಮಾಜಿಕ ಸ್ಥಾನಮಾನದಿಂದ ಅಳೆಯುತ್ತಿರಲಿಲ್ಲ; ಪ್ರತಿಯೊಬ್ಬರನ್ನೂ ಸಮಾನ ಗೌರವದಿಂದ ಬರಮಾಡಿಕೊಳ್ಳುತ್ತಿದ್ದರು.
ಅವರ ನಿವಾಸವು ಅಧಿಕಾರಿಗಳಿಗಷ್ಟೇ ಮೀಸಲಾದ ಸ್ಥಳವಾಗಿರಲಿಲ್ಲ. ರೈತರು, ಕಾರ್ಮಿಕರು, ವಿದ್ಯಾರ್ಥಿಗಳು, ಉಲಮಾಗಳು, ರಾಜಕಾರಣಿಗಳು, ವ್ಯಾಪಾರಿಗಳು, ಅನಾಥರು ಮತ್ತು ನಿರ್ಗತಿಕರು ಎಲ್ಲರಿಗೂ ಅದು ಸದಾ ತೆರೆದ ಬಾಗಿಲಾಗಿತ್ತು. ಯಾರೇ ತಮ್ಮ ಸಮಸ್ಯೆಯೊಂದಿಗೆ ಬಂದರೂ, ಅವರ ಮಾತನ್ನು ಸಂಪೂರ್ಣವಾಗಿ ಆಲಿಸಿ, ಸಾಧ್ಯವಾದಷ್ಟು ನೆರವಾಗಲು ಅವರು ಪ್ರಯತ್ನಿಸುತ್ತಿದ್ದರು.
ಶಿಹಾಬ್ ತಂಙಳ್ ಅವರ ಮಾನವೀಯತೆಯನ್ನು ಅನಾವರಣಗೊಳಿಸುವ ಅನೇಕ ಘಟನೆಗಳು ಜನಮಾನಸದಲ್ಲಿ ಇಂದಿಗೂ ಜೀವಂತವಾಗಿವೆ. ಅವುಗಳಲ್ಲಿ ಒಂದು ಅವರ ಕರುಣಾಮಯ ಹೃದಯವನ್ನು ಸ್ಪಷ್ಟವಾಗಿ ಬಿಂಬಿಸುತ್ತದೆ.
ಒಂದು ದಿನ ತಡರಾತ್ರಿಯಲ್ಲಿ ಅವರು ತಮ್ಮ ವಾಹನದಲ್ಲಿ ಪ್ರಯಾಣಿಸುತ್ತಿದ್ದರು. ದಾರಿಯ ಬದಿಯಲ್ಲಿ ಒಬ್ಬ ಮಹಿಳೆ ಆತಂಕದಿಂದ ಯಾರಾದರೂ ನೆರವಿಗೆ ಬರಬಹುದೆಂಬ ನಿರೀಕ್ಷೆಯಲ್ಲಿ ನಿಂತಿರುವುದನ್ನು ಅವರು ಗಮನಿಸಿದರು. ಕೂಡಲೇ ವಾಹನವನ್ನು ನಿಲ್ಲಿಸುವಂತೆ ಚಾಲಕನಿಗೆ ಸೂಚಿಸಿ, ಆಕೆಯ ಸಂಕಷ್ಟವೇನು ಎಂದು ವಿಚಾರಿಸಲು ಹೇಳಿದರು.
ಮಹಿಳೆಯು ತಮಗೆ ತುರ್ತಾಗಿ ಆಸ್ಪತ್ರೆಗೆ ಹೋಗಬೇಕಾಗಿದೆ; ಆದರೆ ಸಹಾಯಕ್ಕೆ ಯಾರೂ ದೊರೆಯುತ್ತಿಲ್ಲ ಎಂದು ತಿಳಿಸಿದರು. ಇದನ್ನು ಕೇಳಿದ ಶಿಹಾಬ್ ತಂಙಳ್ ಅವರು ಒಂದು ಕ್ಷಣವೂ ವಿಳಂಬ ಮಾಡದೆ ತಮ್ಮ ವಾಹನದಲ್ಲೇ ಅವರನ್ನು ಆಸ್ಪತ್ರೆಗೆ ಕರೆದೊಯ್ಯುವಂತೆ ಚಾಲಕನಿಗೆ ಸೂಚಿಸಿದರು.
ಅಷ್ಟೇ ಅಲ್ಲ, ಚಿಕಿತ್ಸೆ ಪೂರ್ಣಗೊಳ್ಳುವವರೆಗೆ ವಿಚಾರಿಸಿಕೊಂಡು, ಅದರ ಸಂಪೂರ್ಣ ವೆಚ್ಚವನ್ನೂ ಸ್ವತಃ ಭರಿಸಿದರು. ಅಪರಿಚಿತರ ನೋವನ್ನು ತಮ್ಮ ಕುಟುಂಬದ ನೋವಿನಂತೆ ಕಂಡ ಅವರ ಹೃದಯ ವೈಶಾಲ್ಯಕ್ಕೆ ಈ ಘಟನೆ ಜೀವಂತ ಸಾಕ್ಷಿಯಾಗಿದೆ.
ವಿನಯವು ಅವರ ಸಹಜ ಸ್ವಭಾವವಾಗಿತ್ತು. ತಮ್ಮ ಸಾಧನೆಗಳ ಬಗ್ಗೆ ಅವರು ಎಂದಿಗೂ ಹೆಮ್ಮೆಪಡುತ್ತಿರಲಿಲ್ಲ. ಸಮಾಜವು ತೋರಿದ ಗೌರವವನ್ನು ವೈಯಕ್ತಿಕ ಸಾಧನೆಯಾಗಿ ಕಾಣದೆ, ಅಲ್ಲಾಹನ ಅನುಗ್ರಹವೆಂದು ಪರಿಗಣಿಸುತ್ತಿದ್ದರು.
ಅವರ ಸರಳ ಉಡುಗೆ, ಮಿತಭಾಷಿತ್ವ, ಶಾಂತ ನಡವಳಿಕೆ ಮತ್ತು ಎಲ್ಲರನ್ನೂ ಆತ್ಮೀಯವಾಗಿ ಮಾತನಾಡಿಸುವ ಗುಣಗಳು ಜನರನ್ನು ಅವರತ್ತ ಆಕರ್ಷಿಸುತ್ತಿದ್ದವು. ಅವರೊಂದಿಗೆ ಕೆಲವೇ ಕ್ಷಣಗಳ ಸಂಭಾಷಣೆ ನಡೆಸಿದವರೂ ಅವರ ವ್ಯಕ್ತಿತ್ವದ ಆಳವನ್ನು ಅನುಭವಿಸುತ್ತಿದ್ದರು.
'ಕೊನೆಯ ದಿನಗಳು ಮತ್ತು ಜನಮನದಲ್ಲಿ ಮೂಡಿದ ಶೋಕ'
ದೀರ್ಘಕಾಲ ಸಮಾಜದ ಸೇವೆಯಲ್ಲಿ ನಿರಂತರವಾಗಿ ತೊಡಗಿಸಿಕೊಂಡಿದ್ದ ಶಿಹಾಬ್ ತಂಙಳ್ ಅವರ ಆರೋಗ್ಯವು ಜೀವನದ ಕೊನೆಯ ದಿನಗಳಲ್ಲಿ ಕ್ಷೀಣಿಸತೊಡಗಿತು. ಅನಾರೋಗ್ಯದ ನಡುವೆಯೂ ಸಮಾಜದ ಸಮಸ್ಯೆಗಳ ಕುರಿತು ಅವರು ಕಾಳಜಿ ವಹಿಸುತ್ತಲೇ ಇದ್ದರು. ತಮ್ಮನ್ನು ಭೇಟಿಯಾಗಲು ಬರುವವರನ್ನು ಸಾಧ್ಯವಾದಷ್ಟು ನಿರಾಶೆಗೊಳಿಸದೆ ಆತ್ಮೀಯವಾಗಿ ಬರಮಾಡಿಕೊಳ್ಳುತ್ತಿದ್ದರು.
ಅವರ ನಿಧನದ ಸುದ್ದಿ ಕೇರಳದಾದ್ಯಂತ ಮಾತ್ರವಲ್ಲದೆ, ದೇಶ-ವಿದೇಶಗಳಲ್ಲಿರುವ ಅವರ ಅಭಿಮಾನಿಗಳಲ್ಲೂ ಅಪಾರ ದುಃಖವನ್ನು ಉಂಟುಮಾಡಿತು. ವಿವಿಧ ಧರ್ಮಗಳ ಮುಖಂಡರು, ರಾಜಕೀಯ ನಾಯಕರು, ಉಲಮಾಗಳು, ಸಾಮಾಜಿಕ ಕಾರ್ಯಕರ್ತರು ಹಾಗೂ ಸಾಮಾನ್ಯ ಜನರು ಅವರ ಅಗಲಿಕೆಯನ್ನು ಭರಿಸಲಾಗದ ನಷ್ಟವೆಂದು ಬಣ್ಣಿಸಿದರು.
ಅವರ ಅಂತಿಮ ದರ್ಶನಕ್ಕಾಗಿ ಜನಸಾಗರವೇ ಹರಿದುಬಂದಿತ್ತು. ಜನರ ಕಣ್ಣೀರೇ ಅವರು ತಮ್ಮ ಜೀವನದಲ್ಲಿ ಗಳಿಸಿದ್ದ ಪ್ರೀತಿ ಮತ್ತು ವಿಶ್ವಾಸಕ್ಕೆ ಸಾಕ್ಷಿಯಾಗಿತ್ತು. ಅದು ಕೇವಲ ಒಬ್ಬ ನಾಯಕರ ಅಂತಿಮ ಯಾತ್ರೆಯಾಗಿರಲಿಲ್ಲ; ಜನರ ಹೃದಯಗಳನ್ನು ಗೆದ್ದ ಅಪರೂಪದ ಮಾನವತಾವಾದಿಗೆ ಸಲ್ಲಿಸಿದ ಭಾವಪೂರ್ಣ ನಮನವಾಗಿತ್ತು.
ಶಾಶ್ವತ ಪರಂಪರೆ'
ಪಾಣಕ್ಕಾಡ್ ಸಯ್ಯದ್ ಮುಹಮ್ಮದ್ ಅಲಿ ಶಿಹಾಬ್ ತಂಙಳ್ ಅವರು ಇಂದು ನಮ್ಮೊಂದಿಗಿಲ್ಲ. ಆದರೆ ಅವರು ಪ್ರತಿಪಾದಿಸಿದ ಆದರ್ಶಗಳು, ಬೆಳೆಸಿದ ಸಂಸ್ಥೆಗಳು, ರೂಪಿಸಿದ ನಾಯಕತ್ವ ಮತ್ತು ಜನರ ಮನಸ್ಸಿನಲ್ಲಿ ಬಿತ್ತಿದ ಮೌಲ್ಯಗಳು ಇಂದಿಗೂ ಜೀವಂತವಾಗಿವೆ.
ಧಾರ್ಮಿಕ ನಾಯಕತ್ವವು ಹೇಗಿರಬೇಕು, ರಾಜಕೀಯವು ಯಾವ ಮೌಲ್ಯಗಳನ್ನು ಆಧರಿಸಿರಬೇಕು, ಸಮಾಜಸೇವೆಯು ಯಾವ ಮನೋಭಾವದಿಂದ ನಡೆಯಬೇಕು ಮತ್ತು ಮಾನವನನ್ನು ಪ್ರೀತಿಸುವುದು ಹೇಗೆ ಎಂಬುದಕ್ಕೆ ಅವರ ಬದುಕೇ ಒಂದು ಜೀವಂತ ಪಾಠವಾಗಿದೆ.
ಅವರ ಜೀವನವು ಅಧಿಕಾರದ ಇತಿಹಾಸವಲ್ಲ; ಅದು ಸೇವೆಯ ಇತಿಹಾಸ. ಅದು ಕೀರ್ತಿಯ ಕಥೆಯಲ್ಲ; ತ್ಯಾಗದ ಕಥೆ. ಅದು ಒಬ್ಬ ವ್ಯಕ್ತಿಯ ಯಶೋಗಾಥೆಯಲ್ಲ; ಇಡೀ ಸಮಾಜಕ್ಕೆ ದಿಕ್ಕು ತೋರಿದ ಮಹಾನ್ ನಾಯಕನ ಜೀವನ ಸಂದೇಶವಾಗಿದೆ.
ಕರುಣೆ, ವಿನಯ, ಜ್ಞಾನ ಮತ್ತು ಸೇವೆಯ ಪರಿಮಳದಿಂದ ತುಂಬಿದ ಅವರ ಜೀವನವು ಮುಂದಿನ ಪೀಳಿಗೆಗಳಿಗೂ ಸದಾ ದಾರಿದೀಪವಾಗಿರಲಿದೆ. ಸಮಾಜದಲ್ಲಿ ಸೌಹಾರ್ದ, ನ್ಯಾಯ ಮತ್ತು ಮಾನವೀಯತೆಯನ್ನು ಸ್ಥಾಪಿಸಲು ಬಯಸುವ ಪ್ರತಿಯೊಬ್ಬರಿಗೂ ಶಿಹಾಬ್ ತಂಙಳ್ ಅವರ ಬದುಕು ಚಿರಸ್ಥಾಯಿ ಪ್ರೇರಣೆಯಾಗಿ ಉಳಿಯುತ್ತದೆ.
